Almenn fyrisiting og tænasta er ein av fimm yvirskipaðum geirum í føroyska búskapinum, ið fevnir um myndugleikar og stovnar undir almennum ræði, ið framleiða vørur og tænastur til einstaklings- og felagsnýtslu uttan fyri ein marknað.

Hesin geirin er samansettur av 4 undirgeirum:

• Landsfyrisiting og tænasta
• Ríkisfyrisiting og tænasta
• Kommunufyrisiting og tænasta
• Sosialir trygdargrunnar

Tað eru aðrar framleiðandi eindir í búskapinum undir almennum ræði, ið framleiða vørur og tænastur eftir marknaðartreytum, t.e. almenn feløg, ið antin eru partur av geiranum ikki-fíggjarlig feløg ella fíggjarlig feløg. Samlaða almenna virksemið fevnir sostatt um almenna fyrisiting og tænastu og almenn feløg, ið virka eftir vanligum marknaðartreytum.

Orðalýsingar

• Fíggjarkravið, netto, verður eisini nevnt fíggjarliga uppsparingin. Negativt fíggjarkrav, netto, fyri eitt tíðarskeið merkir, at tøka inntøkan er ov lítil til at gjalda nýtslu og íløgur í tíðarskeiðinum. Tá ið einihvørji viðskifti altíð eru fíggjað, er negativt fíggjarkrav tað sama sum lántøka.
• Bruttotjóðarúrtøkan, ið er gjørd upp í marknaðarprísum, er mát fyri virðisskapanina samanlagt í einum tíðarskeiði.
• Bruttoíløgur fevnir um fastar bruttoíløgur í støðisogn, broytingar í goymslu og útvegan av virðislutum, netto.