Almennar útreiðslur eru allar úreiðslurnar, sum geirin almenn fyrisiting og tænasta hevur í einum ári. Útreiðslurnar eru skiftar á virkisøki (funktión) sambært altjóða flokkingini COFOG (Classification of the Functions of Government). Endamálið við flokkingini av almennu útreiðslunum er at lýsa, hvussu ymisku virkisøkini eru raðfest.

Almennar inntøkur eru í høvusheitum skattainntøkur og almennu útreiðslurnar lýsa sostatt, hvussu skattainntøkurnar vera brúktar til ymisk sosiobúskaparlig endamál.

Almennu útreiðslurnar verða skiftar á virkisøki eftir altjóða leisti, og hagtølini eru tí sambærlig við onnur lond. Almennu útreiðslurnar eru eisini skiftar á undirgeirar. Virkisøkið er í tveimum stigum, 10 høvuðsbólkar og 69 undirbólkar.

Orðalýsingar:

• Almenn fyrisiting og tænasta er ein av fimm stovnsligum geirum í føroyska búskapinum og fevnir um myndugleikar og stovnar undir almennum ræði, ið framleiða vørur og tænastur til einstaklings- og felagsnýtslu uttan fyri ein marknað. Geirin, almenn fyrisiting og tænasta, er samansettur av 4 undirgeirum,
  • Landsfyrisiting og tænasta
  • Ríkisfyrisiting og tænasta
  • Kommunufyrisiting og tænasta
  • Sosialir trygdargrunnar
• Stovnsligir geirar eru settir saman av eindum og flokkaðir eftir eins búskaparligari atferð treytað av framleiðsluslag, høvuðsvirksemi, høvuðsuppgávu og fígging. Høvuðsgeirarnir í innlendska búskaparøkinum eru umframt Almenn fyrisiting og tænasta, 
  • Ikki-fíggjarlig feløg
  • Fíggjarlig feløg
  • Húsarhald
  • Felagskapir
  • Umheimurin er geiri fyri seg.
• Vísitøl lýsa prosentvísu broytingina frá ári til árs við einum støðisári, ið verður sett at vera 100. Munurin ímillum tvey ár er máldur í prosentstigum. Samanbera vit við støðisárið, er talan um prosent.
• EA eru tey 19 londini, ið nýta evruna sum gjaldoyra (EA19, juni 2020)
• ES eru tey 27 londini í Evropasamveldinum (ES27, juni 2020)