Sethúsasølan er gjørd upp eftir prísi, tali og staði. Eisini er árliga broytingin í % roknað fyri allar bólkar.

Betri Banki ger upp prísirnar í bústaðahandli í Føroyum hvønn ársfjórðing. Tølini yvir bústaðakeyp- og -sølur stava frá almennu tinglýsingini, har allir handlarnir verða skrásettir.

Bústaðarprísirnir eru viðgjørdir á slíkan hátt, at teir geva eina mynd av kostnaðinum, sum vanligir bústaðir verða keyptir og seldir fyri. Tí verða hesi ikki tikin við:

• Grundøki
• Íbúðir
• Hús á grundøkjum minni enn 250 fermetrar
• Hús á teimum størstu grundøkjunum, tí har kann roknast við, at grundstykkjaprísurin er stórur partur av søluni
• Hús, ið ikki verða hildin at umboða marknaðartreytir, t.d. serliga lágir prísir í sølum millum familjulimir
• Hús, sum eru yvirtikin á tvingsilssølu

Á henda hátt skuldu tølini umboðað prísin á miðalsethúsum í fríum handli.

Tølini yvir sethúsakeyp og -sølur stava frá almennu tinglýsingini, har allir handlarnir verða skrásettir.

Húsasølurnar eru býttar upp eftir øki:

• Tórshavn: Tórshavn, Hoyvík og Argir.
• Størri bygdir og býir: Klaksvík, Runavík, Glyvrar, Fuglafjørður, Gøta, Kollafjørður, Vágur, Tvøroyri, Froðba, Trongisvágur, Miðvágur og Vestmanna.
• Smærri bygdir: Aðrar bygdir, ið ikki eru nevndar omanfyri.
• Tilsamans: Allar Føroyar

Orðalýsingar:

• Ársins prísir (eisini nevnt nominellir prísir) er uppgerð við støði í teimum prísum, ið eru galdandi fyri tað tíðarskeiðið, ið uppgerðin fevnir um.
• Vísitøl lýsa prosentvísu broytingina frá ári til árs við einum støðisári, ið verður sett at vera 100. Munurin ímillum tvey ár er máldur í prosentstigum. Samanbera vit við støðisárið, er talan um prosent.