Løntakarar hava rætt til sjúkradagpening, tá ið teir ikki hava rætt til løn frá arbeiðsgevara í sambandi við óarbeiðsføri vegna sjúku, skaðatilburð ella barnsburð.
Treytin er, at teir heldur ikki hava rætt til tryggingarendurgjald, barnsburðargjald ella annað tílíkt.

Sjúkradagpeningur er ein fyribils veiting, sum kann søkjast av fólki, ið vegna sjúku ella skaðatilburð ikki kunnu røkja sítt starv og tí missa arbeiðsinntøku. Eisini kvinnur, ið eru við barn, kunnu søkja, um ymisk árin gera, at tær gerast óarbeiðsførar ella ikki fáa røkt sítt starv. Somuleiðis kann rættur fáast til dagpening, um tað gerst alneyðugt at vera um álvarsliga sjúkan hjúnafelaga ella barn. Fólk við rætti til løn undir sjúku, kunnu tó ikki fáa dagpening.