Gistingar
27. feb 2023
Besti januarmánaður higartil hjá gistingarhúsunum
Gistinæturnar vóru knapt 7.700 í januar. Tað eru slakar 800 fleiri samanborið við sama mánað í 2022, ið svarar til ein vøkstur upp á 11 prosent. Hetta er samstundis met fyri januarmánað.
Gistinætur telja, hvussu nógvir og hvussu leingi persónar gista á gistingarhúsum.
[px-graph-1]
Flestu gistingarnar eru í Tórshavnarøkinum. Í januar vóru 91% av gistingunum í Tórshavnarøkinum. Tað eru 4 prosent færri enn sama mánað í fjør.
[px-graph-2]
Í januar áttu føroyingar 48 prosent av gistináttunum. Tað eru 5 prosent lægri enn í sama mánað í 2022. Ferðafólk úr Danmark og útlendsk ferðafólk úr øðrum londum enn Danmark áttu ávikavist 31 og 21 prosent.
[px-graph-3]
Fleiri innskrivingar í januar
Innskrivingarnar vóru góðar 4.200 í januar. Tað eru 17 prosent hægri enn í sama mánað í 2022. Innskrivingarnar vísa talið av ferðafólkum á gistingarhúsunum, sama hvussu leingi tey gista.
[px-graph-4]
Nýtslustigið nærum óbroytt
Nýtslustigið vísir, hvussu stórur partur av tøku kømrunum verður brúktur. 24 prosent av kømrunum vóru brúkt í januar. Tað er á sama stigi sum í januar í 2022, tá 22 prosent av kømrunum vóru brúkt.
[px-graph-5]
Orðalýsingar
Persónsgistinætur telja, hvussu nógvir og hvussu leingi persónar gista. Um 10 fólk gista 3 nætur, eru hetta 30 gistinætur.
Innskrivingar telja, hvussu nógvar innskrivingar eru. Um 10 fólk skriva seg inn, eru hetta 10 innskrivingar, óansæð hvussu leingi tey gista. Eisini skrásett, um talan er um frítíðar- ella starvsferð.
Kamarsnætur telja, hvussu nógv og hvussu leingi kømur verða brúkt. Um 10 fólk gista í 5 kømurum í 3 nætur, eru hetta 15 kamarsnætur.
Uppgerðin fevnir ikki um gistingarhúsini í Suðuroy.