Gistingar

24. mar 2022
Gistingarnar kvinka spakuliga uppeftir

Í februar 2022 vóru 9.010 gistingar á føroysku gistingarhúsunum. Tað eru knappliga 1.600 gistinætur fleiri samanborið við sama mánað í 2021. Tað svarar til ein vøkstur upp á 21%. Gistinætur telja, hvussu nógvir og hvussu leingi persónar gista á gistingarhúsum.

[px-graph-1]

Flestu gistingarnar eru í Tórshavnarøkinum. Í februar vóru 94% av gistingunum á gistingarhúsum í Tórshavnarøkinum.

[px-graph-2]

Føroyingar áttu bróðurpartin av gistináttunum á gistingarhúsunum í februar, sum vóru gott 5.200 í tali ella 58% av gistingunum. Talið av gistináttum hjá føroyingum var áleið tað sama sum í februar í 2021.

Ímeðan talið av gistináttum hjá dønum vaks við 66%, nærum tvífaldaðist talið av gistináttum hjá fólkum úr øðrum londum enn Danmark samanborið við í februar í fjør.

[px-graph-3]

Innskrivingar

Innskrivingarnar vóru knappliga 4.800 í tali í februar 2022, sum er 14% hægri enn í februar í fjør. Innskrivingarnar vísa talið av ferðafólkum á gistingarhúsunum, sama hvussu leingi tey gista.

Talið av ferðafólkum úr øðrum londum enn Føroyum og Danmark er farið at vaksa aftur. Tað er meira enn ferfaldað síðan februar í 2021 og innskrivingarnar eru nú næstan 500 í tali. Enn restar nakað í at koma upp á sama stig sum í februar 2020, tá tær vóru 800. Talið av føroyingum, ið gista á gistingarhúsum, er á leið tað sama sum í februar í 2021. Føroyingar áttu tríggjar fjórðingar av innskrivingunum í februar í ár. 

[px-graph-4]

Nýtslustig

Nýtslustigið vísir, hvussu stórur partur av tøku kømrunum verður brúktur. Góð 31% av kømrunum vórðu brúkt í februar, samanborið við 24% í februar í fjør.

[px-graph-5]