Nýbygging av bústaði

15. mar 2023
1.524 nýggir bústaðir síðstu 8 árini, meðan fólkatalið vaks við 5.609

Síðani 2015 er talið av nýggjum bústøðum vaksið við 1.524 bústaðareindum,  – tað veri seg sethúsum, raðhúsum og íbúðum – samstundis sum fólkatalið er vaksið við 5.609.   
Eingin fullfíggjað bústaðarskráseting er. Tí verða skrásetingarnar hjá SEV viðvíkjandi gjøldum fyri (ný)íbindingar í elkervið nýttar. Við hesum fæst ein ábending um, hvussu nógvir nýggir bústaðir verða bygdir.  
Til og við 2008 eru allar nýbyggingar skrásettar sum sethús. Men frá 2009 eru nýbyggingarnar bólkaðar í sethús, raðhús og íbúðir.  
Í yvirlitinum sæst, at stórar broytingar eru hendar í byggiháttinum seinastu árini.

[px-graph-1]

Frá 2009 var sera stór minking í byggingini av nýggjum bústøðum, úr 274 í 2009 niður í 71 í 2014. Men frá 2017 veksur talið aftur líðandi upp í 331 nýggjar bústaðir í 2022.

Samstundis hendir stór broyting í byggiháttinum, tí nú eru íbúðir og raðhús nógv størsti parturin av nýggjum bústøðum. Síðstu 8 árini var talið av nýggjum sethúsum 652, meðan talið av nýggjum íbúðum og raðhúsum var 872.

Bústaðarbyggingin í sýslunum

Verður hugt eftir bústaðarbyggingini í sýslunum fyri árini 2015-22 sæst, at nógv flestu bústaðir eru bygdir í Streymoyar sýslu, har eisini nógv tað mesta fólkið býr, og har fólkavøksturin hevur verið størstur. Samstundis sæst, at tað eisini er har, at byggingin av íbúðum er nógv tann størsta í mun til sethúsabygging: dupult so nógvar íbúðir sum sethús. Øvugt er í Eysturoy, har byggingin av sethúsum er meir enn dupult so stór sum byggingin av íbúðum og raðhúsum.

[px-graph-2]

Í talvuni niðanfyri sæst, hvussu býtið av nýggjum bústøðum er millum sýslurnar. Av teim 1.524 nýggju bústøðunum eru 988 í Streymoyar sýslu, svarandi til 65% - samanborið við, at 3.045 av samlaða fólkavøkstrinum á 5.609 var í Streymoyar sýslu, svarandi til 54%

Hini økini í landinum eiga tískil 35% av nýbygdum bústøðum, samanborið við 46% av fólkavøkstrinum hesi seinastu 8 árini.

Nýbygging og fólkavøkstur

Frammanfyri varð nevnt, at byggingin av nýggjum bústøðum ikki rættiliga hevur fylgt við stóra vøkstrinum í fólkatalinum. Niðanfyri eru hesi bæði samanborin, við at nýbygging av bústøðum og vøkstur í fólkatali bæði eru sett til 100 í 2009. Her sæst, at fólkatalið var áleið óbroytt fram til 2015 og síðani fór at vaksa. Øvugt hevur verið við bústaðarbyggingini, sum heilt fram til 2020 er dragnað nógv í mun til fólkavøksturin. Tað vil siga at hetta tíðarskeiðið er bústaðartrotið bara økt ár eftir ár.