Starvsfólk
 18. jun 2026
30.400 starvsfólk í mai — 450 fleiri enn í fjør

Í mai vóru 450 fleiri í starvsfólkaskaranum samanborið við sama mánað í fjør, sum er ein vøkstur á 1,5 prosent. Vøksturin var størri hjá monnum. Aftan á Tórshavnar kommunu vóru flest starvsfólk løgd aftur at Klaksvíkar kommunu. Vøkstur í starvsfólki sæst tvørtur um øki.

Starvsfólkatalið veksur framvegis, men seinastu árini er vøksturin viknaður. Tað sæst á trendinum, sum lýsir gongdina við at reinsa fyri árstíðarfrávik og øðrum tilvildarligum broytingum. 

Í mai vóru 30.377 starvsfólk í Føroyum. Tað eru 448 starvsfólk, ella 1,5 prosent, fleiri enn fyri ári síðani. 

[px-graph-1]

Í mai vóru um 15.450 menn og 14.900 kvinnur í starvsfólkaskaranum. Hetta eru 290, ella 1,9 prosent, fleiri menn, og 160, ella 1,1 prosent, fleiri kvinnur samanborið við sama mánað í fjør.

[px-graph-2]

Stórar kommunur hava størsta vøkstur

Tórshavnar kommuna átti um 45 prosent av starvsfólkavøkstrinum, tá samanborið er við sama mánað í fjør. Harumframt er talið av starvsfólkum serliga vaksið í Klaksvíkar kommunu, Eysturkommunu og Runavíkar kommunu. Lutfalsliga var vøksturin tó størstur í Hovs kommunu við 25 prosentum. 

Samanborið við sama mánað árið fyri, er starvsfólkatalið minkað í níggju av teimum 29 kommunum — mest í Kvívíkar kommunu.

[px-graph-3]

Starvsfólkatalið vaksið tvørtur um landið

Býtt á tey sjey økini, sæst at starvsfólkatalið er vaksið í seks av hesum, tá samanborið er við sama mánað í fjør. Tað einasta øki, sum ikki hevði vøkstur, var Norðstreymoyar øki, har talið er óbroytt. 

Lutfalsliga var vøksturin størstur í Eysturoyar øki við 2,4 prosentum. Í tali vóru tó flest løgd aftur at Suðurstreymoyar øki. 

[px-graph-4]

 

Um starvsfólkahagtølini

Uppgerðin um starvsfólk fevnir um persónar, ið eru 13 ár ella eldri,  búsitandi í Føroyum, og sum í mánaðinum fáa A-skattaða løn svarandi til 4 tímar um mánaðin ella meira gjøgnum Samtíðarskattaskipanina (STSS). Harafturat telja persónar í fyribils fráveru (t.d. sjúka og barsil)  eisini við, sjálvt um teir fáa løn ella ikki. 

Hagtøl um starvsfólk og størv fylgja leiðreglunum í handbókunum um starvsfólk og størv hjá International Labour Organization (ILO) undir Sameindu Tjóðum. 

Orðalýsingar:

  • Starvsfólk (høvuðstarv) er samlað tal av persónum í starvi. Starvið tekur støði í hvar persónurin fær størstu lønina frá. Ein persónur telur bert einaferð.
  • Bústaðarkommuna og -øki vísur til hvar persónurin býr og ikki hvar starvið er. 
Vís fleiri grafar
Vís talvur (Hagtalsgrunnur)