Fólkatal

07. des 2022
54.150 búðu í Føroyum í november — vøksturin er 1,1%

Seinasta árið er vøksturin í fólkatalinum minkaður úr 1,5% niður í 1,1%. Minkingin kemur serliga av burðaravlopinum, sum hevur verið óvanliga lítið seinasta árið. Myndin niðanfyri vísir gongdina í fólkatalinum. 

[px-graph-1]

Fólkatalið verður ávirkað av nettoflyting, sum er munurin millum tilflyting og fráflyting, og burðaravlopi, sum er munurin millum fødd og deyð. Vøksturin seinasta árið kemur av einum burðaravlopi á 124 fólk og eini nettoflyting á 483 fólk. Í talvuni niðanfyri sæst millum annað, at nettoflytingin var eitt sindur minni enn í undanfarna tíðarskeiði, og at burðaravlopið minkaði við meira enn helvtini.

Mong flyta frá — fleiri flyta til

Myndin niðanfyri lýsir gongdina í til- og fráflytingini. Trendurin vísir, at gongd kom aftur á flytingarnar síðst í 2020. Eftir tað vaks fráflytingin lutfalsliga skjótt, og síðani fram til síðst í 2021, og hevur síðani ligið um í miðal 117 fólk mánaðarliga. So stór hevur fráflytingin ikki verið síðani 2014.

Tilflytingin hevur verið javnt vaksandi fram til juni mánaða í ár, og hevur síðan ligið um 160 fólk í miðal mánaðarliga. So stór hevur tilflytingin ikki verið síðan aldarskiftið.  

[px-graph-2]

Færri verða fødd — færri fella frá

Deyðatalið, sum hevur verið óvanliga høgt í nøkrum av seinastu mánaðunum, tykist nú at minka aftur. Hetta sæst aftur í trendinum, sum lýsir gongdina í deyðatalinum. Trendurin vísir, at deyðatalið nú liggur um 35 í miðal mánaðarliga. Í uppgerðunum higartil í ár hevur tað annars ligið um 45 í miðal mánaðarliga.

[px-graph-3]

Fólkatalið í kommunum og bygdum

Talvan niðanfyri vísir fólkatalið í kommununum við tilhoyrandi bygdum 1. november í ár í mun til somu tíð í fjør. 

Í kommununum vaks fólkatalið mest í Tórshavnar, Runavíkar og Sjóvar kommunu, meðan størsta minking var í Sumbiar og Skálavíkar kommunu. 

Í bygdunum vaks fólkatalið mest í Tórshavn, á Argjum, í Hoyvík og á Strondum, meðan tað minkaði mest í Søldarfirði, í Sørvági og í Skálavík.

[px-graph-4]