Fólkatal
10. jan 2024
54.550 fólk búðu í Føroyum 1. desember — vøksturin er 0,9%
Fólkatalið veksur framvegis, men vøksturin minkar. Árliga broytingin, sum í 2023 hevur ligið um 1%, er nú komin niður á 0,9%. Seinast, árliga broytingin lá um 1% í longri tíð, var í 2014.
[px-graph-1]
Fólkatalið verður ávirkað av nettoflyting, sum er munurin millum tilflyting og fráflyting, og burðaravlopi, sum er munurin millum fødd og deyð. Vøksturin seinasta árið kemur av einum burðaravlopi á 176 og eini nettoflyting á 302 fólk.
Talvan niðanfyri vísir, at fólkavøksturin seinasta árið var minni enn í undanfarna tíðarskeiði.
Færri flyta
Trendarnir í myndini niðanfyri vísa gongdina í til- og fráflytingini. Trendarnir geva ábendingar um minkingar í bæði tilflyting og fráflyting. Tilflytingin tykist minka meiri enn fráflytingin, og samanlagt minkar hetta um nettoflytingina. Í tíðarskeiðnum frá 2017 til 2022 lá árliga nettoflytingin millum 400 og 500 fólk. Seinasta árið var hon 302 fólk.
[px-graph-3]
Færri føðast og doyggja
Trendarnir í myndini niðanfyri lýsa gongdina í føði- og deyðatalinum. Trendarnir vísa minkingar í bæði føðitalinum og deyðatalinum seinastu tvey árini. Deyðatalið er minkað meir enn føðitalið, og samanlagt økir tað um burðaravlopið. Áðrenn stóru minkingina í burðaravlopinum, sum byrjaði fyri tveimum árinum síðani, lá burðaravlopið millum 200 og 300 børn. Í undanfarna tíðarskeiði var tað niðri á 121 børnum, og seinasta árið var tað vaksið upp á 176 børn.
[px-graph-2]
Fáir danskir ríkisborgarar leggjast afturat
Talið av persónum, sum hava annan ríkisborgaraskap enn danskan, er vaksið nógv seinastu fimm árini. Men soleiðis er ikki við donskum ríkisborgarum. Danskir ríkisborgarar, sum áður hava staðið fyri størsta partinum av fólkavøkstrinum, stóðu fyri 8% av vøkstrinum seinasta árið. Myndin niðanfyri vísir, at lítil fólkavøkstur var millum danskir ríkisborgarar í Føroyum seinasta árið.
[px-graph-4]
Flestu kommunurnar vaksa
Seinasta árið vaks fólkatalið í 18 av teimum 29 kommunum. Størsti vøkstur var í Tórshavnar, Klaksvíkar og Runavíkar kommunu. Í teimum kommununum vaks fókatalið serliga í Tórshavn, Hoyvík, Klaksvík og Saltangará. Fólkatalið minkaði í 10 kommunum og var óbroytt í einari. Fimm av teimum 10 kommununum við minking í fólkatalinum seinasta árið eru í Suðuroy. Sí fleiri tøl í talvuni niðanfyri, sum vísir fólkatalið í kommununum við tilhoyrandi bygdum 1. desember 2022 og 2023.
[px-graph-5]
Fólkatølini eru ein mánað afturút
Orsøkin til, at fólkatølini eru ein mánað afturút, er at seinkingar eru í skrásetingunum, serliga flytingar, har fleiri verða skrásettar eftir at uppgjørdi mánaðurin er liðugur. Fyri at fáa tær flestu rættingarnar við, verður bíðað ein mánað, so at uppgerðin verður so rættvísandi sum gjørligt.
Stutt um fólkatølini
Fólkatalið er øll fólk, sum sambært Landsfólkaskránni eru skrásett at búgva í Føroyum.
Hagtøl um fólkatalið fevna um øll, sum eru skrásett at búgva í Føroyum, har tey eru lýst við føðidegi, kyni, føðistaði, ríksborgaraskapi, borgarastøðu, upplýsingum um møguliga tilflyting og fráflyting, innlendis eins og millum Føroyar og útlond.
Stutt um trendin
Trendurin lýsir rákið í fólkatalinum við at reinsa fyri árstíðarfrávik og aðrar tilvildarligar broytingar í fólkatalinum.