Fólkatal

22. aug 2023
54.600 fólk búðu í Føroyum 1. juli - vøksturin er 1,1%

Síðani fólkavøksturin byrjaði fyri skjótt 10 árum síðani, er fólkatalið vaksið við 6.500 fólkum ella 14%. Gongdin í fólkavøkstrinum hevur verið ymisk í økjunum kring landið, og ferðin á fólkavøkstinum hevur verið ymisk frá ári til ár. Seinastu tíðina hevur fólkavøksturin verið lakari enn undanfarnu árini, og tað hómast aftur í myndini niðanfyri.  

[px-graph-1]

Fólkatalið verður ávirkað av nettoflyting, sum er munurin millum tilflyting og fráflyting, og burðaravlopi, sum er munurin millum fødd og deyð. Vøksturin seinasta árið kemur av einum burðaravlopi á 185 fólk og eini nettoflyting á 424 fólk. Talvan niðanfyri vísir, at samanborið við undanfarna tíðarskeið er nettoflytingin minkað meðan burðaravlopið er vaksið. 

Gongdin í flytingunum óbroytt

Trendarnir í myndini niðanfyri vísa, at gongdin á tilflyting og fráflyting ikki er broytt stórvegis seinastu mánaðirnar.  Tilflytingin og fráflytingin fóru at vaksa seint í 2020, og vøksturin helt fram til í fjørheyst. Tá kom broyting í. Gongdin í tilflytingini minkaði nakað, meðan vøksturin í fráflytingini steðgaði. Síðani tá hevur gongdin í bæði tilflytingini og fráflytingini verið mestsum óbroytt. 

[px-graph-2]

Deyðatalið minkar meiri enn føðitalið

Trendarnir vísa, at gongdin í føðitalinum og deyðatalinum hevur verið minkandi seinastu mánaðirnar. Gongdin í deyðatalinum hevur tó verið meiri minkandi enn tann í føðitalinum, og samanlagt veksur hetta um munin millum fødd og deyð. Deyðatalið er nú minkað so mikið nógv, at tað er á sama stigi sum framman undan stóra vøkstrinum, sum var í fjør.

[px-graph-3]

Størsti vøkstur í Eysturoyar øki seinastu 10 árini

Fólkatalið hevur í longri tíð verið javnt vaksandi, men stórur munur er á økjunum kring landið. Samanborið við 1. juli 2013 er fólkatalið vaksið í øllum økjum uttan Sandoyar- og Suðuroyar øki. Størsti vøksturin hevur verið í Suðurstreymoyar- og Eysturoyar øki við 17-18%, síðani í Vága-, Norðoya- og Norðstreymoyar øki við 7-12%. So gott sum ongin broyting hevur verið í Sandoyar- og Suðuroyar øki. Prosentvísa gongdin síðan 2013 sæst í myndini niðanfyri.

[px-graph-4]

Vøksturin størstur í størstu kommununum

Í kommununum var fólkavøksturin størstur í Tórshavnar, Runavíkar og Klaksvíkar kommunu. Síðani í Nes og Sjóvar og Vestmanna kommunu. Í bygdunum vaks fólkatalið mest í Tórshavn, Klaksvík, Argjum, Saltangará og á Toftum. Sí fleiri tøl í talvuni niðanfyri, sum vísir fólkatalið í kommununum við tilhoyrandi bygdum 1. juli 2022 og 2023.   

[px-graph-5]