Arbeiðsloysi

25. nov 2025
Arbeiðsloysið var 0,9 prosent í oktober

Í oktober var arbeiðsloysið 0,9 prosent, sum er á sama støði, sum fyri einum ári síðani. 

[px-graph-1]

Í oktober vóru 303 persónar raktir av arbeiðsloysi, sum er 34 færri enn í sama mánað árið fyri. 

Fulltíðararbeiðsleys er talið av teimum, sum eru rakt av arbeiðsloysi, umroknað til fulltíðararbeiðsloysi. Til dømis telja tveir persónar, sum hava verið arbeiðsleysir í ein hálvan mánað hvør, samanlagt sum ein fulltíðararbeiðsleysur persónur. Í oktober vóru tað 264 fulltíðararbeiðsleys, sum eru 12 færri enn í oktober í fjør. 

[px-graph-2]

Arbeiðsloysið er minni hjá kvinnum 

Í oktober vóru 116 kvinnur raktar av arbeiðsloysi, sum eru 13 færri samanborið við sama mánað í fjør. Umroknað til fulltíðararbeiðsloysi svaraðu tær til 101, sum er eitt arbeiðsloysi á 0,7 prosent. Hetta er sama prosent sum í sama mánað árið fyri. 

187 menn vóru raktir av arbeiðsloysi, sum eru 21 færri enn í oktober í fjør. Umroknað til fulltíðararbeiðsloysi vóru teir 163, sum svarar til 1,0 prosent. Hetta er óbroytt ið mun til sama mánað í fjør.

[px-graph-3]

Suðuroyar øki størst arbeiðsloysi

Landkortið vísir arbeiðsloysi eftir bústaðarøki. Í oktober var arbeiðsloysið størst í Suðuroyar øki við 1,5 prosentum. Hetta er 0,5 prosentstig hægri enn í oktober í fjør. Lægsta arbeiðsloysið var í Norðoya øki við 0,4 prosentum.

Fleiri útgreinaði hagtøl um arbeiðsloysi býtt á øki kunnu síggjast á økissíðunum: Norðoya øki, Eysturoyar øki, Norðstreymoyar øki, Suðurstreymoyar øki, Vága øki, Sandoyar øki, Suðuroyar øki

[px-graph-4]

Arbeiðsloysið minkað í yngru aldursbólkunum 

Størsta arbeiðsloysið í oktober var millum tey 25-34 ára gomlu við 1,3 prosentum, hóast tey høvdu eina ta størstu minkingina við 0,2 prosentstigum. Minsta arbeiðsloysið var hjá teimum í aldrunum 16 til 24 ár við 0,5 prosentum, sum er 0,2 prosentstig lægri enn sama mánað í fjør. Í hinum aldursbólkunum er minni broyting. 

[px-graph-5]

Ein av átta hevur verið arbeiðsleysur í meira enn eitt ár 

Myndin niðanfyri vísir, hvussu leingi fólk hava verið rakt av arbeiðsloysi. Størsti bólkur, 29 prosent ella 89 persónar, av teimum arbeiðsleysu í oktober høvdu verið arbeiðsleys millum 30 til 89 dagar. 

Í oktober vóru 41 persónar ella góð 13 prosent av teimum arbeiðsleysu langtíðararbeiðsleys. Tað vil siga, at tey hava verið arbeiðsleys í longur enn eitt ár (365+ dagar). Hetta er á leið tað sama sum í fjør. 

[px-graph-6]