Útflutningur av vørum
 18. jun 2024
Fiskavøruútflutningurin vaksin 84 milliónir krónur

Samlað var útflutt fyri 12,8 milliardir krónur í uppgerðarárinum frá mai 2023 til apríl 2024. Tað eru 449 milliónir krónur minni, ella 3,4%, enn undanfarna skeið. Tó er útflutningurin av fiskavørum vaksin 84 milliónir, knapt 1%.

Útflutningurin í apríl er nú gjørdur upp, og í talvunum niðanfyri ber til at síggja útflutningin tíðarskeiðið mai 2023 til apríl 2024 samanborið við undanfarna tíðarskeiðið.

Fiskavøruútflutningurin er vaksin 84 milliónir krónur, ella um 1 prosent. Útflutningurin av laksi, fóðuri, fskamjøli og lýsi gongur fram, meðan útflutningurin av øðrum fiskasløgum gongur aftur ella stendur í stað. Minkingin í bólkinum "Ikki fiskur" stavar fyri tað mesta frá minni útflutningi av brennievni og skipum. 

Útflutningurin av laksi er vaksin 319 milliónir krónur. Virðið er vaksið við seks prosentum og nøgdin er vaksin við trimum prosentum.

Vørur sum toga útflutningin uppeftir eru fiskamjøl, lýsi og vørur ikki til mannaføði - eitt nú slógv og fóður. Her er vøksturin 411 milliónir krónur, ella 22 prosent. 

 

[px-graph-1]

 

[px-graph-2]

 

Myndin niðanfyri vísir útflutningin skiftan á ISSCFC fiskavørur. Tað hevur seinastu árini verið ein vøkstur í útflutninginum av fiskamjøli, fóðuri og lýsi.

[px-graph-3]

Uppsetanin av talvunum fyri innflutning og útflutning eru broyttar. Eitt nú kann bæði inn- og útflutningur veljast í øllum talvum. Somuleiðis kann bæði virði og nøgd veljast í øllum talvum. 

Nýggja SITC talvan (UH01026) minnir um gomlu talvurnar (UH01020 og UH01021). Annars eru hesar broytingar:

  • Farið verður frá 4. útgávu av BEC til 5. útgávu.
  • Fyri fiskavørur brúka vit ISSCFC flokkingina hjá FAO.
  • Fiskasløgini fylgja flokkingini MCS (Main Commercial Species) hjá The European Market Observatory for fisheries and aquaculture products (EUMOFA), sum ES nevndin hevur sett á stovn. Harumframt ber í hesi talvu til at síggja, hvussu fiskurin er viðgjørdur og hagreiddur.

Í ISSCFC eru nógvar vørur og tískil ber til at leita tær vørur fram, brúk er fyri. Leitast kann eftir kotum og teksti.

Í løtuni er alt ikki umsett til føroyskt. Haldið okkum til góðar. Í ISSCFC talvuni ber til at leita á enskum. Ætlanin er, at alt við tíðini verður umsett til føroyskt.

Vís fleiri grafar
Vís talvur (Hagtalsgrunnur)