Fólkatal

12. sep 2022
Fólkatalið er nú 54.200 - vøksturin er 1,3%

Áhaldandi vøksturin, sum hevur verið at sæð í fólkatalinum seinastu árini, er viknaður nakað seinastu mánaðirnar. Hetta hómast í myndini niðanfyri, har trendurin vísir gongdina í fólkatalinum síðan 1985. Íkastið frá burðaravlopinum er nógv minkað, men partur av minkingini verður tó uppvigaður av einari lítlari øking í nettoflytingini.

[px-graph-1]

Talvan niðan fyri vísir broytingar í fólkatalinum í seinasta og í undanfarna tíðarskeiði. Ein fjórðingur av vøkstrinum hetta tíðarskeiðið kemur av einum burðaravlopi á 160 fólk, og tríggir fjórðingar koma frá eini nettoflyting á 510 fólk. Burðaravlopið er munurin millum fødd og deyð, og nettoflytingin er munurin millum til- og fráflyting.

Burðaravlopið er minkað í helvt samanborið við undanfarna tíðarskeið. Hetta kemur av, at færri eru fødd og fleiri eru deyð. Hinvegin er nettoflytingin økt í mun til undanfarna tíðarskeið. Gongd er aftur komin á flytingarnar, sum minkaðu nógv eftir at koronufarsóttin byrjaði at gera um seg. 

Ein lítil øking í nettoflytingini

Íkastið til fólkavøksturin frá nettoflytingini seinasta árið var gott 40 fólk í miðal mánaðarliga. Eins og trendurin í myndini niðan fyri vísir, so er hetta ein lítil øking samanborið við undanfarna tíðarskeið.

[px-graph-2]

Burðaravlopið nógv minkað

Talið av deyðum hevur verið hægri enn vanligt seinastu mánaðirnar. Í fleiri ár var gongdin tann, at í miðal 30 fólk doyðu um mánaðin. Seinastu seks mánaðirnar er hetta broytt, og nú doyggja um 45 fólk í miðal mánaðarliga. Skiftið sæst týðiliga aftur í trendinum í myndini niðanfyri. Trendurin vísir eisini, at føðitalið, sum vaks í 2020, nú er aftur á sama stigi sum frammanundan.

[px-graph-3]

Kommunurnar

Í mun til somu tíð í fjør er fólkatalið vaksið í 14 kommunum, minkað í 14 kommunum og óbroytt í einari kommunu. 

Størsti vøkstur í tali var í Tórshavnar kommunu. Nú búgva yvir 23.000 fólk í kommununi, og tað svarar til 43% av fólkatalinum. Av teimum 23.000 eru 21.000 búsitandi í Tórshavn, Hoyvík og Argjum. Næststørsti vøkstur í tali var í Eysturkommunu, sum nú hevur 2300 íbúgvar. 

Lutfalsliga størsti vøkstur á heili 4,7% var í Nes kommunu. Sostatt nærkast fólkatalið í Nes kommunu 1500 fólkum. Somuleiðis var lutfalsliga stórur vøkstur í Eysturkommunu, Eiðis og Vestmanna kommunu. 

Fólkatalið minkaði mest í Hvalbiar og Sands kommunu. 

Sí fleiri tøl í talvuni niðanfyri, sum vísir fólkatalið í hvørjari kommunu við tilhoyrandi bygdum 1. august 2021 og 2022.

[px-graph-4]