Fólkatal
10. sep 2024
Gott 54.900 fólk búðu í Føroyum 1. august — vøksturin er 0,5%
Fólkavøksturin í Føroyum heldur fram, men vøksturin gerst minni fyri hvørjar tólv mánaðir, sum ganga. Frá 1. august í fjør til 1. august í ár vaks fólkatalið við 296 fólkum ella 0,5 prosentum. Tað eru bara helvtin av fólkavøkstrinum í undanfarna tíðarskeiði, tá 571 løgdust afturat. Fólkavøksturin minkaði fyrst og fremst tí nettoflytingin minkaði niður í helvt samanborið við undanfarna tíðarskeið. Myndin niðanfyri vísir gongdina í fólkatalinum síðan 1985.
[px-graph-1]
Fólkatalið verður ávirkað av nettoflyting, sum er munurin millum tilflyting og fráflyting, og burðaravlopi, sum er munurin millum fødd og deyð. Fólkavøksturin seinasta árið kom av einum burðaravlopi á 129 og eini nettoflyting á 167 fólk.
Samanborið við tíðarskeiðið frá 1. august 2022 til 1. august 2023 minkaði nettoflytingin niður í helvt. Orsøkin til, at nettoflytingin minkaði, var, at færri fluttu til Føroya. Burðaravlopið minkaði eisini. Orsøkin var, at færri børn vórðu fødd.
Nettoflytingin minkaði millum uttanríkisborgarar
Tað var serliga millum uttanríkisborgarar, at nettoflytingin minkaði seinastu 12 mánaðirnar. Orsøkin var fyrst og fremst, at tilflytingin millum uttanríkisborgarar minkaði. Hetta sæst, tá flytingarnar verða skiftar á ríkisborgaraskap.
Millum danskar ríkisborgarar minkaði tilflytingin á leið tað sama sum fráflytingin minkaði. Nettoflytingin broyttist tí ikki stórvegis millum danskar ríkisborgarar seinasta 12-mánaðaskeið samanborið við undanfarna tíðarskeið. Nettoflytingin millum danskar ríkisborgarar hevur verið negativ seinastu trý 12-mánaðaskeiðini. Tað eru sostatt bara uttanríkisborgarar, sum hesi trý tíðarskeiðini hava staðið fyri ískoytinum frá nettoflytingini til fólkavøksturin.
Talvan niðanfyri vísir flytingar til og úr Føroyum skiftar á bústaðartilknýti í fimm teimum seinastu 12-mánaðaskeiðunum.
Færri flytingar
Trendarnir í myndini niðanfyri vísa mánaðarligu gongdina í til- og fráflytingini. Gongdin í bæði til- og fráflytingini er minkandi. Tilflytingin minkar tó væl meiri enn fráflytingin minkar, og tað minkar munandi um nettoflytingina.
[px-graph-3]
Færri verða fødd
Trendarnir í myndini niðanfyri lýsa mánaðarligu gongdina í føði- og deyðatalinum. Meðan gongdin í deyðatalinum hevur funnið eina fasta legu vísa trendarnir, at støðugt minkandi gongdin í føðitalinum heldur fram.
[px-graph-2]
Fólkatalið í kommunum og bygdum
Í kommununum vaks fólkatalið mest í Tórshavnar, Klaksvíkar, Nes og Vága kommunum. Í býunum og bygdunum løgdust flest fólk afturat í Tórshavn, Klaksvík, Hoyvík og á Strondum. Fólkatalið minkaði mest í Sunda, Eiðis og Vágs kommunum.
Á Sandoynni vaks fólkatalið í øllum kommunum uttan Sands kommunu. Fólkatalið í Húsavíkar kommunu vaks við tíggju fólkum, og tað hevur síðan 1. august í fjør gjørt Húsavíkar kommunu fólkaríkari enn Hovs kommunu.
Talvan niðanfyri vísir fólkatalið í kommununum við tilhoyrandi bygdum 1. august 2023 og 2024. Gongdin í fólkatalinum í einstøku bygdunum sæst her.
[px-graph-5]
Fólkatølini eru ein mánað afturút
Orsøkin til, at fólkatølini eru ein mánað afturút, er at seinkingar eru í skrásetingunum, serliga flytingar, har fleiri verða skrásettar eftir at uppgjørdi mánaðurin er liðugur. Fyri at fáa tær flestu rættingarnar við, verður bíðað ein mánað, so at uppgerðin verður so rættvísandi sum gjørligt.
Stutt um fólkatølini
Fólkatalið er øll fólk, sum sambært Landsfólkaskránni eru skrásett at búgva í Føroyum.
Hagtøl um fólkatalið fevna um øll, sum eru skrásett at búgva í Føroyum, har tey eru lýst við føðidegi, kyni, føðistaði, ríksborgaraskapi, borgarastøðu, upplýsingum um møguliga tilflyting og fráflyting, innlendis eins og millum Føroyar og útlond.
Stutt um trendin
Trendurin lýsir rákið í fólkatalinum við at reinsa fyri árstíðarfrávik og aðrar tilvildarligar broytingar í fólkatalinum.