Fólkatal
10. jan 2025
Knapt 54.700 fólk búðu í Føroyum 1. desember — vøksturin er 0,5%
Hóast fólkatalið framvegis veksur, so er vøksturin minkandi. Minni burðaravlop og minni nettoflyting minka um fólkavøksturin.
[px-graph-1]
Fólkatalið verður ávirkað av nettoflyting, sum er munurin millum til- og fráflyting, og burðaravlopi, sum er munurin millum fødd og deyð. Seinasta árið var burðaravlopið 128 og nettoflytingin 152 fólk. Tilsamans gav tað ein fólkavøkstur á 280 fólk.
Bæði burðaravlopið og nettoflytingin vóru minni enn í undanfarna tíðarskeiði. Færri fólk fluttu til og úr Føroyum. Tilflytingin minkaði tó meir enn fráflytingin minkaði, og samanlagt gjørdi tað nettoflytingina minni enn í undanfarna tíðarskeiði. Burðaravlopið minkaði, tí nøkur færri vóru fødd og fleiri doyðu enn í undanfarna tíðarskeiði.
Sí fleiri tøl í talvuni niðanfyri.
Støðugari føði- og deyðatal
Trendarnir í myndini niðanfyri lýsa gongdina í føði- og deyðatalinum. Trendurin fyri føðitalið gevur ábending um, at gongdin í føðitalinum, sum hevur verið støðugt minkandi í longri tíð, hevur funnið eina meir støðuga legu enn frammanundan, meðan gongdin í deyðatalinum er við tað sama.
[px-graph-2]
Færri flytingar
Trendarnir í myndini niðanfyri vísa mánaðarligu gongdina í til- og fráflytingini. Myndin vísir, at gongdin í bæði til- og fráflytingini er javnt minkandi fyri hvønn mánað.
[px-graph-3]
Flestu kommunurnar vaksa
Seinasta árið vaks fólkatalið í 19 av teimum 29 kommunum. Størsti vøksturin var í Tórshavnar, Runavíkar, Nes, Vága og Skálavíkar kommunu. Í teimum kommununum vaks fólkatalið serliga í Tórshavn, á Toftum, í Hoyvík, í Saltangará og í Skálavík.
Fólkatalið minkaði í níggju kommunum og var óbroytt í einari. Størsta minking var í Eiðis, Vágs og Sunda kommunu. Sí fleiri tøl í talvuni niðanfyri, sum vísir fólkatalið í kommununum við tilhoyrandi bygdum 1. desember 2023 og 2024.
[px-graph-4]
Fólkatølini eru ein mánað afturút
Orsøkin til, at fólkatølini eru ein mánað afturút, er at seinkingar eru í skrásetingunum, serliga flytingar, har fleiri verða skrásettar eftir at uppgjørdi mánaðurin er liðugur. Fyri at fáa tær flestu rættingarnar við, verður bíðað ein mánað, so at uppgerðin verður so rættvísandi sum gjørligt.
Stutt um fólkatølini
Fólkatalið er øll fólk, sum sambært Landsfólkaskránni eru skrásett at búgva í Føroyum.
Hagtøl um fólkatalið fevna um øll, sum eru skrásett at búgva í Føroyum, har tey eru lýst við føðidegi, kyni, føðistaði, ríksborgaraskapi, borgarastøðu, upplýsingum um møguliga tilflyting og fráflyting, innlendis eins og millum Føroyar og útlond.
Stutt um trendin
Trendurin lýsir rákið í fólkatalinum við at reinsa fyri árstíðarfrávik og aðrar tilvildarligar broytingar í fólkatalinum.