Fólkatal
11. nov 2024
Knapt 54.700 fólk búðu í Føroyum 1. oktober — vøksturin er 0,6%
Hóast fólkatalið framvegis veksur, so er vøksturin minkandi. Um 300 fólk løgdust aftur at í Føroyum seinastu tólv mánaðirnar, og tað eru bara tveir triðingar av fólkavøkstrinum í undanfarna tíðarskeiði. Broytingin er javnt býtt millum burðaravlopið og nettoflytingina.
[px-graph-1]
Fólkatalið verður ávirkað av nettoflyting, sum er munurin millum til- og fráflyting, og burðaravlopi, sum er munurin millum fødd og deyð. Fólkavøksturin seinastu tólv mánaðirnar taldi 309 fólk og kom av einum burðaravlopi á 128 og eini nettoflyting á 181 fólk.
Fólkavøksturin seinastu tólv mánaðirnar var 148 fólk minni enn í undanfarna tíðarskeiði. Helvtin av minkingini var í burðaravlopinum og hin helvtin í nettoflytingini. Burðaravlopið var minni, serliga, tí færri vóru fødd. Nettoflytingin var minni, tí hóast færri fluttu av landinum enn í undanfarna tíðarskeiði, so vóru tað uppaftur færri, sum fluttu til landið. Sí fleiri tøl í talvuni niðanfyri.
Færri verða fødd
Trendarnir í myndini niðanfyri lýsa gongdina í føði- og deyðatalinum. Trendarnir vísa, at støðugt minkandi gongdin í føðitalinum heldur fram, meðan gongdin í deyðatalinum er við tað sama.
[px-graph-2]
Færri flyta
Trendarnir í myndini niðanfyri vísa mánaðarligu gongdina í til- og fráflytingini. Gongdin í bæði til- og fráflytingini er minkandi. Tilflytingin er tó minkað nakað meiri enn fráflytingin, og tað minkar um nettoflytingina.
[px-graph-3]
Størsti vøkstur í størstu kommununum
Í kommununum var fólkavøksturin størstur í Tórshavnar, Runavíkar, Nes og Vága kommunum. Í bygdum og býum vaks fólkatalið mest í Tórshavn, á Argjum, í Hoyvík og á Toftum. Kommunurnar við størstu afturgongd í fólkatalinum vóru Eiðis, Sunda, Vágs og Fuglafjarðar kommunur, har fólkatalið minkaði við um 30 fólkum í hvørjari kommunu seinasta árið.
Talvan niðanfyri vísir fólkatalið í kommununum við tilhoyrandi bygdum 1. oktober 2023 og 2024. Gongdin í fólkatalinum í einstøku bygdunum sæst her.
[px-graph-6]
Fólkatølini eru ein mánað afturút
Orsøkin til, at fólkatølini eru ein mánað afturút, er at seinkingar eru í skrásetingunum, serliga flytingar, har fleiri verða skrásettar eftir at uppgjørdi mánaðurin er liðugur. Fyri at fáa tær flestu rættingarnar við, verður bíðað ein mánað, so at uppgerðin verður so rættvísandi sum gjørligt.
Stutt um fólkatølini
Fólkatalið er øll fólk, sum sambært Landsfólkaskránni eru skrásett at búgva í Føroyum.
Hagtøl um fólkatalið fevna um øll, sum eru skrásett at búgva í Føroyum, har tey eru lýst við føðidegi, kyni, føðistaði, ríksborgaraskapi, borgarastøðu, upplýsingum um møguliga tilflyting og fráflyting, innlendis eins og millum Føroyar og útlond.
Stutt um trendin
Trendurin lýsir rákið í fólkatalinum við at reinsa fyri árstíðarfrávik og aðrar tilvildarligar broytingar í fólkatalinum.