Fólkatal
10. nov 2021
Seinasta árið løgdust 805 fólk afturat í Føroyum
Lutfalsligi vøksturin í fólkatalinum er tann sami sum í undanfarna tíðarskeiði, tá fólkatalið eisini vaks við 1,5%. Sostatt hevur lutfalsligi fólkavøksturin ligið millum 1,5% og 1,8% fyri hvørt 12-mánaðarskeið í út við fýra ár. Myndin niðanfyri vísir gongdina í fólkatalinum.
[px-graph-1]
Fólkatalið verður ávirkað av nettoflyting (munurin millum tilflyting og fráflyting) og burðaravlopi (munurin millum fødd og deyð). Vøksturin síðsta árið kemur av eini nettoflyting á 517 og einum burðaravlopi á 288, og tað er tætt við tað sama sum í undanfarna tíðarskeiði.
Grovaru strikurnar í myndini niðanfyri vísa gongdina í tilflytingini og fráflytingini.
[px-graph-2]
Grovaru strikurnar í myndini niðanfyri vísa gongdina í føðitalinum og í deyðatalinum.
[px-graph-3]
Talvan niðanfyri vísir fólkatalið skift á øki fyri 1. oktober 2020 og 2021. Størsti parturin av teimum, sum løgdust afturat fólkatalinum seinasta árið, búgva í Suðurstreymoyar og Eysturoyar økjum. Soleiðis var eisini í undanfarna tíðarskeiði. Men í hinum fimm økjunum var seinasta árið annarleiðis enn undanfarna tíðarskeið. Í Norðoya, Vága og Suðuroyar økjum vaks fólkatalið seinasta árið uppaftur meira, meðan Norðurstreymoyar og Sandoyar øki fóru frá einum vøkstri í fólkatalinum undanfarna skeið til eina minking hetta seinasta árið.
[px-graph-4]
Fólkatølini eru ein mánað afturút
Orsøkin til, at fólkatølini eru ein mánað afturút, er at seinkingar eru í skrásetingunum, serliga flytingar, har fleiri verða skrásettar eftir at uppgjørdi mánaðurin er liðugur. Fyri at fáa tær flestu rættingarnar við, verður bíðað ein mánað, so at uppgerðin verður so rættvísandi sum gjørligt.
Stutt um fólkatølini
Fólkatalið er øll fólk, sum sambært Landsfólkaskránni eru skrásett at búgva í Føroyum.
Hagtøl um fólkatalið fevna um øll, sum eru skrásett at búgva í Føroyum, har tey eru lýst við føðidegi, kyni, føðistaði, ríksborgaraskapi, borgarastøðu, upplýsingum um møguliga tilflyting og fráflyting, innlendis eins og millum Føroyar og útlond.
Stutt um trendin
Trendurin lýsir rákið í fólkatalinum við at reinsa fyri árstíðarfrávik og aðrar tilvildarligar broytingar í fólkatalinum.