Arbeiðsmegi er eitt altjóða mát, sum telur partin av fólkinum millum 15-74 ár, ið kann veita arbeiðsmegi.

Arbeiðsmegin fevnir um tveir bólkar:

• Arbeiðsvirkin eru tey, sum eru løntakarar, eru fyribils úr arbeiði ella arbeiða fyri seg sjálvan. Tey arbeiða fyri løn, vinning ella feingi
• Arbeiðsleys eru tey, sum einki arbeiði hava, søkja arbeiði og eru til reiðar at byrja at arbeiða innan fyri 2 vikur

Orðalýsingar:

• Vinnuliga óvirkin eru tey uttan fyri arbeiðsmegina, sum hvørki eru arbeiðsvirkin ella arbeiðsleys 
• Vinnutíttleiki er arbeiðsmegin í % av øllum fólkatalinum í vinnuførum aldri, t.e. frá 15 til og við 74 ár
• Feingi er vøru- ella gerðabýti ella annar ágóði, ið ikki er peningur
• EA eru tey 19 londini, ið nýta evruna sum gjaldoyra (EA19, juni 2020)
• ES eru tey 27 londini í Evropasamveldinm (ES27, juni 2020) 

Tølini eru fingin til vegar við støði í almennum skráum, har løntakarar, vinnurekandi og arbeiðsleys verða funnin. Hesi tølini verða síðani fullfíggjað við spurnakanning millum 1.000 av teimum, ið ikki eru at finna í skráunum. Hesi 1.000 spurdu verða síðani upproknað til fulla talið av óskrásettum (uml. 5.000). Kanningin verður gjørd seinast í november hvørt ár, har spurt verður um arbeiðsviðurskifti í vikuni, sum 15. november er í.

Í spurnakanningini verða øll, ið høvdu meira enn 1 tíma vinnuligt arbeiði í kanningarvikuni, flokkað sum arbeiðsvirkin, eisini um arbeiðið var ólønt. Tey sum einki arbeiði hava, verða bert flokkað sum arbeiðsleys, um tey eru virkin at leita sær arbeiði og eru til reiðar at byrja at arbeiða innan fyri 2 vikur.

Áðrenn 2015 bygdu tølini ikki á skráir, men høvdu støði burturav í spurnakanningini, ið varð upproknað til fulla arbeiðsmegi.

Arbeiðsloysið í hesi kanningini kann ikki beinleiðis samanberast við hini arbeiðsloysistølini hjá Hagstovuni, ið eru grundað á skráir hjá arbeiðsloysistryggingini (ALS) og Almannastovuni.