Javnvirðisinntøka er ein umroknað tøk inntøka hjá hvørjum einstøkum við atliti at vaksnum og børnum í húskinum. Øll í húskinum, børn og vaksin, fáa tillutað somu javnvirðisinntøku.

Javnvirðisinntøkan verður roknað, tí hendan inntøkan hjá húskinum sigur meiri um, hvørjar nýtslumøguleikar tey einstøku í húskinum hava, enn tøka inntøkan hjá tí einstaka. Eitt stórt húski má hava størri samlaða tøka inntøku enn eitt lítið, tí tað kostar meiri at uppihalda einum stórum húski. Men samstundis eru eisini fyrimunir í einum stórum húski. Eitt húski við fimm fólkum skal ikki rinda alt fimm ferðir (t.d. orku, hvítvørur, o.s.fr.).

Tá javnvirðisinntøkan verður roknað, verða persónarnir í húskinum vigaðir ymiskt. Tann fyrsti vaksni telur 1, næsti vaksni telur 0,5 og børn undir 14 ár telja 0,3.

Orðalýsingar:

• Inntøka er inntøka frá løn fyri arbeiði og yvirskot frá egnum virki, veitingar frá tí almenna, so sum pensjón, dagpeningur, rentustuðul og lestrarstudningur, umframt ognarinntøka, so sum rentuinntøkur, virðisbrævavinningur o.a. kapitalinntøkur.
• Samlað inntøka er inntøkan hjá tí einstaka, áðrenn skattur og onnur lógarkravd gjøld eru drigin frá.
• Tøk inntøka er inntøkan hjá tí einstaka, eftir skatt og onnur lógarkravd gjøld.
• Miðinntøka er tann mittasta inntøkan, t.e. tann inntøkan, sum býtir talið av øllum persónunum í Føroyum í tveir eins stórar bólkar: Helvtin av persónunum hevur størri inntøku og hin helvtin minni inntøku enn miðinntøkuna.
• Miðalinntøka er roknað sum eitt vanligt miðal.
• Húski eru persónar sum pr. 31. desember í árinum hava sama skrásettan bústað í landsfólkaskránni. Fólk á stovni ella á felagsbýli eru ikki tald við. Sostatt er ikki talan um fulla populatión. Harumframt er eisini kravt, at minst ein persónur í húskinum skal hava havt skattskyldu alt árið. Vaksin eru persónar 18 ár ella eldri.
• Inntøkan í einum persentilrúmi er miðalinntøkan hjá persónunum í persentilrúminum.

Sí eisini Samlað inntøka, Tøk inntøka, Inntøkubýti og Fátækaváði.

Roknidømi:

Vit hava tvey húski:

Húski 1:  er ein persónur, við eini tøkari inntøku á 200.000 krónur.
Húski 2:  er eitt húski við tveimum vaksnum og tveimum børnum. Húskið hevur eina tøka inntøku á 420.000 kr.

Í húski 1 er bara ein persónur, og tí hevur hann eina javnvirðisinntøku upp á 200.000 kr.
Í húski 2 eru fleiri persónar, og tí skal skal tøka inntøkan vigast (1 fyri fyrsta vaksna, 0,5 fyri næsta og 0,3 fyri hvørt barnið) fyri at fáa javnvirðisinntøkuna hjá hvørjum persóni. Hetta verður roknað við at býta samlaðu tøku inntøkuna hjá húskinum 420.000 kr. við 2,1 (1+0,5+0,3+0,3) tað gevur 200.000 kr.

Sostatt eru persónarnir í báðum húskjunum í somu støðu og hava somu nýtslumøguleikar – hjá øllum er javnvirðisinntøkan 200.000 kr.
Øll í húskinum, børn og vaksin, fáa tillutað somu javnvirðisinntøku.

Viðmerking:

Orsøkin til at uppgerðin um javnvirðisinntøkuna er eitt gott ár afturút er, at skattaskráin hjá TAKS, sum er grundarlagið undir inntøkuuppgerðini, ikki er liðugt uppgjørd fyrr enn gott og væl eitt ár eftir uppgerðarárið.