Fólkatal

10. nov 2022
54.100 búðu í Føroyum í oktober — 1,2% fleiri enn í fjør

Seinasta árið hevur vøksturin í fólkatalinum verið lakari enn undanfarnu árini. Tað hómast aftur í trendinum, sum lýsir gongdina í fólkatalinum. 

[px-graph-1]

Lága burðaravlopið partvíst uppvigað av nettoflytingini

Fólkatalið verður ávirkað av nettoflyting, sum er munurin millum tilflyting og fráflyting, og burðaravlopi, sum er munurin millum fødd og deyð.

Íkastið til fólkavøksturin frá burðaravlopinum er minkað nógv seinasta árið. Høvuðsorsøkin er, at deyðatalið hevur verið hægri enn vanligt.

Minkaða burðaravlopið verður tó partvíst uppvigað av íkastinum frá nettoflytingini, sum er vaksið nakað í sama tíðarskeiði. Korona hevði við sær, at færri fluttu til og úr Føroyum á sumri 2020, men um ársskiftið í 2020 kom gongd aftur á flytingarnar. Síðani tá er tilflytingin vaksin meira enn fráflytingin, og tað hevur viðført eina lítla øking í nettoflytingini seinasta árið.

Talvan niðan fyri vísir broytingar í fólkatalinum í hesum og undanfarna tíðarskeiði.

Mong flyta frá — fleiri flyta til

Myndin niðanfyri lýsir gongdina í til- og fráflytingini. Trendurin vísir, at gongd kom aftur á flytingarnar síðst í 2020. Fráflytingin vaks lutfalsliga skjótt fram til síðst í 2021, og er síðani minkað nakað aftur. Nú flyta í miðal 110 fólk av landinum mánaðarliga í mun til 117 fyri einum ári síðani. Hóast hesa minkingina hevur fráflytingin ikki verið hægri enn tað sama síðan á sumri 2014.

Tilflytingin hevur verið javnt vaksandi fram til juni mánaða í ár, og er síðan tá minkað nakað aftur. Nú flyta í miðal 160 fólk til Føroya mánaðarliga í mun til 151 somu tíð í fjør. So stór hevur tilflytingin ikki verið síðan aldarskiftið. 

[px-graph-2]

Mong fella frá — fleiri verða til

Myndin niðanfyri lýsir gongdina í tali av føddum og deyðum. Trendurin vísir, at eftir eina øking á heystið 2020, er burðartalið komið at liggja í eini fastari legu á 52 børn í miðal mánaðarliga.

Í sama tíðarskeiði er deyðatalið vaksið óvanliga nógv, og trendurin vísir somuleiðis, at deyðatalið er komið at liggja í eini fastari legu á 43 í miðal mánaðarliga. Til samanberingar hevur deyðatalið seinastu mongu árini ligið um 30 í miðal mánaðarliga.

Tó er tað enn so, at tað eru fleiri, ið verða til enn sum fella frá, og í trendinum hómast ein ábending um, at munurin fer at økjast. 

[px-graph-3]

Fólkatalið í kommunum og bygdum

Talvan niðanfyri vísir fólkatalið í kommununum við tilhoyrandi bygdum 1. oktober í ár í mun til somu tíð í fjør. 

Í kommununum var størsti vøkstur í fólkatalinum í Tórshavnar kommunu og Eysturkommunu, meðan størsta minking var í Sumbiar og Viðareiðis kommunu. 

Í bygdunum vaks fólkatalið mest í Tórshavn, á Argjum, í Hoyvík og á Strondum, meðan tað minkaði mest í Søldarfirði, í Leynum, í Árnafirði og á Viðareiði.

[px-graph-4]