Fólkatal

11. mar 2024
Knapt 54.600 fólk búðu í Føroyum 1. februar — vøksturin er 0,8%

Fólkavøksturin í Føroyum heldur fram á tíggjunda ári. Seinastu tvey árini hevur hann verið lakari enn frammanundan. Burðaravlopið hevur verið lutfalsliga lítið, fyrst vegna vøkstur í deyðtalinum og síðani vegna minking í burðartalinum. Nettoflytingin er eisini minkað nakað, bæði vegna minking í tilflytingini og minking í fráflytingini. Samanlagt gevur tað ein lakari fólkavøksturin enn áður, og hetta sæst aftur í myndini niðanfyri, sum vísir gongdina í fólkatalinum síðan 1985. 

[px-graph-1]

Fólkatalið verður ávirkað av nettoflyting, sum er munurin millum tilflyting og fráflyting, og burðaravlopi, sum er munurin millum fødd og deyð. Vøksturin seinasta árið kemur av einum burðaravlopi á 160 og eini nettoflyting á 290 fólk. Talvan niðanfyri vísir, at fólkavøksturin seinasta árið var minni enn í undanfarna tíðarskeiði. 

Færri flyta

Trendarnir í myndini niðanfyri vísa gongdina í til- og fráflytingini. Trendarnir í flytingunum vísa minking í bæði tilflyting og fráflyting. Tilflytingin er minkað meiri enn fráflytingin, og er nú á sama stigi sum í 2020. Samanlagt minkar hetta um nettoflytingina. Í tíðarskeiðnum frá 2017 til 2022 lá árliga nettoflytingin millum 400 og 500 fólk. Seinasta árið var hon 290 fólk. 

[px-graph-3]

Færri verða fødd og færri doyggja

Trendarnir í myndini niðanfyri lýsa gongdina í føði- og deyðatalinum. Trendarnir vísa minkingar í bæði føðitalinum og deyðatalinum seinastu tvey árini. Deyðatalið er minkað meir enn føðitalið, og samanlagt økir tað um burðaravlopið. Áðrenn stóru minkingina í burðaravlopinum, sum byrjaði fyri tveimum árinum síðani, lá burðaravlopið millum 200 og 300 børn. Í undanfarna tíðarskeiði var tað niðri á 143 børnum, og seinasta árið vaks tað upp á 160 børn. 

[px-graph-2]

Knapt 1.000 fólk við bústaðartilknýti hava annan ríkisborgaraskap enn danskan

Grafurin niðanfyri vísir, hvussu mong hava bústaðartilknýti, og hvussu mong av teimum annaðhvørt hava danskan ella annan ríkisborgaraskap. 

51.263 fólk í Føroyum høvdu bústaðartilknýti til Føroya 1. februar. Tað merkir, at 94 prosent av fólkinum annaðhvørt hava búð í Føroyum helvtina av lívinum ella í 7 av 10 samanhangandi árum. Hetta áramálið er valt við íblástri í krøvum, sum verða sett til uppihald, tá søkt verður um ríkisborgaraskap í norðurlondum. Talið av teimum, sum hava bústaðartilknýti, men ikki hava danskan ríkisborgaraskap, kann tí geva eina ábending um, hvussu mong í Føroyum lúka kravið um uppihald til danskan ríkisborgaraskap. Tey vóru knapt 1.000 í tali 1. februar í ár. 

Til samanburðar kann nevnast, at fram til 1. januar 2024 høvdu tilsamans 410 persónar í landsfólkaskránni fingið danskan ríkisborgaraskap.

Bústaðartilknýti er eitt nýtt hugtak hjá Hagstovuni. Meira kann lesast um bústaðartilknýti á temasíðuni og í greinini um bústaðartilknýti. 

[px-graph-5]

Nógvar kommunur vaksa

Hóast fólkavøksturin er minkandi í landinum sum heild, so høvdu 14 av teimum 29 kommununum fólkavøkstur seinasta árið. Størsti vøkstur var í Tórshavnar, Klaksvíkar, Runavíkar og Eysturkommunu. Í teimum kommununum vaks fólkatalið serliga í Tórshavn, Hoyvík, Klaksvík og í Leirvík. Fólkatalið var óbroytt í tveimum og minkaði í 13 kommunum. Størsta minking var í Hvalbiar kommunu. Sí fleiri tøl í talvuni niðanfyri, sum vísir fólkatalið í kommununum við tilhoyrandi bygdum 1. februar 2023 og 2024. 

[px-graph-6]