Løntakarar

13. des 2023
Løntakaraskarin vaksin 0,8 prosent seinasta árið

Í november vóru 28.200 løntøkarar. Tað eru stívliga 200 fleiri enn sama mánað í fjør, sum svarar til ein vøkstur upp á 0,8 prosent. Løntakaratalið er vaksið støðugt síðani 2021, men gongdin kann benda á, at stígur er um at koma í vøksturin.

[px-graph-1]

Fallið, sum sæst í grafinum, er í aprílmánaði í 2020, tá ið landið fór niður í ferð.

Lutfalsliga fleiri kvinnur lagstar aftrat løntakaraskaranum

Tað løgdust bæði fleiri menn og kvinnur aftrat løntakaraskaranum seinasta árið. Í november vóru um 14.500 menn og 13.800 kvinnur løntakararar. Vøksturin er ávikavist 0,7 prosent hjá monnum og 0,9 prosent hjá kvinnum í mun til árið fyri. 

[px-graph-2]

Størsti vøkstur er í byggivinnuni 

Myndirnar niðanfyri vísa løntakaratalið og mánaðarligu gongdina í teimum fýra høvuðsvinnugreinabólkunum.

Í 'almennari o.a. tænastu' hevur vøksturin verið rættiliga javnur síðani 2014. Tá vóru um 8.500 løntakarar, og teir eru nú 10.550 í tali. Seinasta árið er løntakaratalið vaksið við 44 persónum, sum svarar til ein vøkstur upp á 0,4 prosent. 

[px-graph-3]

Seinastu tvey árini hevur løntakaratalið í privatum tænastuvinnum staðið meira ella minni í stað. Í mun til sama mánað í fjør, er løntakaratalið tó vaksið við 81 fólkum ella 0,9 prosent .

[px-graph-4]

Innan 'byggivinnu o.a. tilvirking' steðgaði vøksturin upp í 2020, og løntakaratalið minkaði nakað. Nú sæst aftur ein vøkstur í hesum vinnugreinabólkinum og løntakaratalið setti met ár. Borið saman við november í fjør eru 152 fleiri løntakarar, sum er ein vøkstur upp á 3,5 prosent.

[px-graph-5]

Innan 'fiskivinnu o.a. tilfeingisvinnu' eru sveiggini í løntakaratalinum størri enn í hinum vinnugreinabólkunum. Seinastu árini hevur løntakaratalið ligið millum 4.100 og 4.200.

[px-graph-6]

Fimm prosent færri løntakarar innan ali- og kryvjivirki og fiskavøruídnað

Talvan niðanfyri vísir løntakaratalið í ymsu vinnugreinunum, sum hoyra undir vinnugreinabólkarnar. Talvan vísir løntakaratalið í november í 2023 borið saman við november í 2022.

Lutfalsliga størsta afturgongd  er innan ali- og kryvjivirki og innan fiskavøruídnað, tá ið hugt verður at stóru vinnugreinunum. Løntakarar í vinnugreinini 'gistihús og matstovuvirki' eru 4,1 prosent færri í tali. 

Innan 'heilsu- og almannaverk' minkaði løntakaraskarin 1,5 prosent, sum varð ávirkað av verkfallinum í november í ár.

[px-graph-7]

Útlendskir ríkisborgarar áttu meginpartin av vøkstrinum í november

Løntakarskarin er vaksin við góðum 200 persónum í november í ár samanborið við sama mánað í fjør. Meginparturin av vøkstrinum í november er útlendskir ríksborgarar. Teir eiga 86 prosent av vøkstrinum. 

Í november vóru 7,7 prosent av løntakarunum útlendskir ríkisborgarar. Um sama mundið í fjør vóru teir 7,1 prosent.

Størsti parturin starvast innan fiskavøruídnað, gistihús og matstovuvirki, ali- og kryvjivirki, umframt húsarhaldstænastur.

[px-graph-8]

Seinastu árini eru tað serliga løntakarar aðrastaðni frá enn úr Evropa, sum eru vorðnir fleiri. Teir eru nú 4,2 prosent av løntakaraskaranum. Fyri einum ári síðani vóru teir 3,6 prosent.

[px-graph-9]